محمد حديش

صُورَة الحْبيبْ

*************** (زجل مغربي)

رْسَمتْ صورَة الحْبيبْ وْشامْ

 فَ الگَلْبْ مَحْفورَة مَنْ ازْمانْ

تْغَرْبَتْ فَ ضُو الگَمْرَا شْحالْ

كِيَّتْ الْعَطْفَة شْواتْ شَلاَّ يَّامْ

هَزِّيتْ الْوَقْفَة فْ ديكْ النَّجْمَة

سْحَرْني زينْ حْروفْ سْماها

ؤُعْيَّطْتْ يا خِيطْ السَّرْغِيرْ بانْ

فاجِي عَ الْگَلْبْ ما تْزيدْ تَنْهادْ

يا ناسْ الغْرامْ واشْ دْوا الْحالْ

نَجْدَبْ جْدَبْتي فْ ديكْ  الْعَتْبَة 

نْحَرَّكْ سَواكْني ؤُنْعَيَّطْ الْعَلاَّمْ

راهْ اسْحَرْني الزِّينْ ؤُدابْ القْوامْ

سَعْدي تْسَگَّمْ فْ شُوفْتو فَرْحانْ

نْسَّانِي حْروفو تَعْكيلَتْ الزْمانْ

راني نْزَمَّمْ المْحَبَّة قْبَّة تْزارْ

مَنْ ديكْ الزَّاوْيَة هَيَّجْني الْغرامْ

وْلِّيتْ انْهَتْهَتْ صورْتْها فَ الظْلامْ

يْباتْ خْيالْها گَمْرا ضَوَّاتْ المْنامْ

أَعارْ الله إِتْفَكْ هدَاكْ الْمَعْكودْ

ؤُيَتْفاجا وْجَهْ الْفَگْعا ؤُالغْرامْ

الْوَلْفْ وَلاَّفْ وَلْفَتْ كَبْدَتْ الْحالْ

ما قْدَرْتْ انْهَبَّطْ ضَغْمَتْ السْكاتْ

مْلِّي نْشوفْها يْتَخْطَفْ المْجاجْ

وَيْتْسَرَّحْ لْسانْ القْوافِي وَلْهانْ

نْگَادْ سَنْتيرْ ميزانْ حْروفْ الهْوَا

ما يْگَدْني ديوانْ الكْلامْ شَلَّالْ

نَسْقي مَحْبوبِي كاسْ فَرْحانْ

مَنْ يْدِّي لِيدِّيهْ تَمَّ بانْ الْبَرْهانْ

ؤُكْتَبْنا الْعَهْدْ امْعَطَّرْ بَ الرِّيحانْ

مَنْ قْصيدَتْ الغْرَامْ بْداتْ قْصَّتْنا

فْ تَحْتْ ديكْ النَّخْلَة التَّامْرَة

وَرَّتْنا حْروفْنا مْصَفْيَة الْأَجْيالْ

بقلم محمد حديش

م͠ج͠د͠و͠ب͠ آ͠ل͠ح͠رف͠

04/08/2018