قطار الحياه
قطر الحياه ماشى وعمال يلف بينا ويدور
يوم يمشى فى الضلمه ويوم يمشى كمان فى النور
جواه ناس حزينه بتبكى وناس فرحانه وفى هنا وسرور
وناس لابسه دهب وحرير وبتلمع كما البلور
وسطهم ناس غلابه ولابسه البفته والدمور
ولو الأقشيه بقت معدن يلبسو جلاليب من الكستور
قطر الحياه ماشى وعمال يلف بينا ويدور
فيه راجل سليم وبيشحت وعامل فيها مكسور
طب ليه تبقى مطاطي ليه تعيش مذلول
قوم ودور على شغل يلا إنقلع غور
دا إللى يرمى حموله على الله هايعيش فيه مستور
قطر الحياه ماشى وعمال يلف بينا ويدور
الناس فيه درجات فيه منهم لابس طربوش بزر وزرزور
وفيه كتير منهم متعوده دايما ولابسه الطرطور
وناس فيه طيبه زى الملايكه وستات زى بنات الحور
وماشى بينا فى الحياه جوه حلقه مفرغه داير ياناس مايدور
وإللى هايجى محطته راح ينزل ويفضل إللى عليه الدور
قطر الحياه ماشى وعمال يلف بينا ويدور
✏رضا حسب النبى
تعليقات
إرسال تعليق